《牛奶吐司》 (湯種法)
當日點解開始研究整麵包，係因為發現用麵包機做出黎既麵包，口感同出面買既有明顯分別，第二朝食已經變到好實。為左要整啲好食又鬆軟既麵包，花左啲時間自學研究，發現原來用湯種法做麵包，出黎既口感非常柔軟，一心&一意都好中意食軟棉棉既麵包，自此之後基本上屋企整既大部份麵包款式都會自己加入湯種。
如果屋企有小朋友，想食健康既自家制麵包，只要有部麵包機同焗爐，其實屋企都可以整到好多花款。無麵包機亦可以用手搓粉，大約搓10-20分鐘直到麵糰拉到薄膜就完成。
由最基本既牛奶吐司開始，整果醬多士或者做三文治，人人都會鍾意~
材料:
此份量可做一條450g吐司 (20.6cmx10.8cmx11cm吐司模)
麵糰材料:
高筋粉 270g
湯種 96g
牛奶 50g
蛋 50g
糖 40g
鹽 2g
牛油 25g
奶粉 5g (如沒有可省略)
速發酵母 5g
湯種材料:
高筋粉 20g
水/牛奶 100g
(麵粉 : 水份比例為1 : 5)
*此份量湯種煮後約為96g，可使用全部湯種做此牛奶吐司
湯種做法:
1，麵粉和水拌勻，於平底鍋低火煮至杰身，期間要不停搞拌，放涼備用。
2，如果常做麵包，湯種份量可以預備多一點，於雪櫃儲存4-5日，需要時直接使用。
牛奶吐司步驟:
1，將材料放入面包機，依次序濕材料(湯種、牛奶、蛋)先放，再放乾材料(鹽、糖、奶粉、麵粉、酵母)。
*酵母應放進酵母容器，如沒有的話，酵母和鹽應分開放，以免壓抑酵母活躍程度。
2，啟動麵糰模式。材料攪拌成糰後放進軟化牛油。
3，麵糰完成第一次發酵後(發至兩倍大)取出，放在工作檯。
4，用手按壓麵糰排氣，切割3份，滾圓。用濕布或保鮮紙蓋上麵糰，靜置15分鐘。
5，用擀麵棍把麵糰壓成長方形，向內摺起左右兩邊，壓平，捲起成圓柱。
6，三份麵糰平放入吐司盒作最後發酵約45分鐘-1小時。麵糰發酵至8成滿蓋上吐司盒蓋。
7，吐司盒放入已預熱焗爐，180°c焗30分鐘。完成後倒出放於鐵架至完全涼透才切片。
*想麵包更香，可用北海道3.6牛奶
#湯種 #牛奶吐司
Search